Babad

Sampurasun sadayana J

Ayeuna simkuring badé nyarita hiji babad. Babad téh mangrupa carita wanda heubeul anu medar riwayat luluhur atawa kajadian-kajadian penting jaman baheula di salasahiji daérah, biasana ti mimiti ngabedah éta wewengkon. Nilik kana eusina, babad téh deukeut-deukeut kana sajarah.

Wilujeung maca contoh babad di handap ieu.

KAMPUNG PULO

            Kampung téh nyaéta kumpulan sawatara imah di pasisian. Geuning aya paribasa ‘Urang kampung bau lisung’ nu hartina pamoyokan ka urang pasisian nu dusun atawa ngampung. Lian ti éta harti kampung téh nyaéta sabagian wilayah désa, nu pangeusina boga tingkah laku kawas urang kampung anu aya di pasisian.

            Kampung Pulo nyaéta ngaran hiji kampung atawa tempat anu aya di Désa Cangkuang, Kecamatan Lélés, Kabupatén Garut. Disebut Kampung Pulo kusabab éta kampung téh deukeut ka situ, nu nepi ka ayeuna nelah Situ Cangkuang. Malah di tempat éta gé aya candi, nyaéta Candi Cangkuang.

            Masarakat Kampung Pulo téh ngagem agama Islam. Inohong nu mimiti nyeubarkeun agama Islam di Kampung Pulo nyaéta Arif Muhammad. Asalna mah utusan ti Mataram anu meunang pancén ti Sultan Agung pikeun nyerang VOC di Batavia dina abad ka-17. Ku sabab gagal, waktu mulangna deui kalah bumén-bumén di éta kampung.

            Kaayaan kahirupan sapopoé masarakatna béda tinu séjén. Upamana waé, pangeusi ieu kampung téh resep pisan jarah ka kuburan para karuhunna nu ku maranéhna dianggap karamat atawa suci. Sabab anggapan maranéhna mah jarah kubur téh sarua jeung ibadah ogé. Dina poé Rebo dipahing jarah ka makam karamat Cangkuang.

            Ciri has séjénna, nu ngabéakeun pangeusi Kampung Pulo jeunh urang téh nyaéta jumlah jiwa dina hiji kaluwarga teu menang leuwih ti genep urang. Lamun leuwih ti genepan, salasahiji kaluwargana kudu pindah ka tempat séjén, nu teu jauh ka éta wewengkon. Dina nyieun imah gé béda jeung urang ayeuna, di Kampung Pulo mah jarang aya imah témbok, ari lain pangeusi kampung nu geus dianggap jauh pisan ti éta tempat mah.

            Nu anéhna deui, di Kampung Pulo mah dipahing pisan miara sasatoan nu sukuna opat, atawa nabeuh goong. Ari sababna, lamun hal ieu tetep dilakukeun ku pangeusi éta kampung, bakal dianggap pamali atawa ngarémpak adat kabiasaan didinya. Balukarna bakal jadi mamala di kampung éta.                                                                                                                                                                                                                                                                                                                                                                                                                                                                                                                                                          

Sumber: SIGAP SUNDA (VII)